Blog
II Aniversario
Hoxe cúmprense dos anos da aparición de Proxecto ARGA na rede: vinte e catro meses nos que se publicaron máis de cen rehabilitacións, coas súas correspondentes historias e proxectos, e resumidas en máis de mil imaxes.
Neste percorrido estivemos acompañados por case tres mil amigos en Facebook e case cincocentos en Twitter… e esperamos que esta gran familia virtual aumente e gocemos todos xuntos desta viaxe polas Arquitecturas Rehabilitadas de Galicia.
E foi pensando nestes amigos, en vós, que se nos ocorreu celebrar o noso segundo aniversario dándovos as grazas por estar aí, por estar ao outro lado da rede, lendo as novas incorporacións semanais, dándonos o voso apoio para buscar novas rehabilitacións, colaborando e aportando as vosas propias intervencións…
E como non, esta é unha boa ocasión para presumir, unha vez máis, dese gran premio que foi o recoñecemento do noso traballo na XIII Bienal de Arquitectura e Urbanismo, na categoría de Divulgación e Transferencia Social.
Para comezar este novo ano, curso ou como lle queirades chamar... temos moitas novidades e proxectos en marcha, que ao longo das próximas semanas irán vendo a luz. Esperamos que vos gusten, porque sen vós, isto non sería posible.
Un millón de grazas!
