Castelo de Pobra de Parga
Historia
Con forma de polígono regular e situado nun outeiro dende o que se domina a vila de Parga e a ponte sobre o río homónimo, o castelo de Pobra de Parga foi construído no século XII sobre un primitivo asentamento castrexo.
Na segunda metade do século XIV o castelo pertencía a Ares Vázquez de Parga. Este cedeullo ao seu fillo, o famoso cabaleiro Fernán Pérez Parragués, quen reedificou a totalidade do inmoble. E sería o seu primoxénito quen fundase o maiorazgo de Parga Bergantiños–.
Durante o ano 1603, a edificación funcionou como cárcere xurisdicional.
A principios do século XX aínda existía a antiga muralla, os perpiaños da cal foron reaproveitados para reconstruír a igrexa parroquial e as casas adxacentes, podendo observarse as marcas de canteiros.
A comezos do ano 2006 no Encontro dos Camiños organizado polo Concello de Guitiriz propúxose a rehabilitación do castelo como museo dos camiños históricos, enlazado co municipio a través da ruta do auga e do camiño dos arrieiros. Pero a idea quedou no esquecemento.
Na actualidade, do antigo castelo medieval tan só quedan os restos dunha parte da muralla, de boa fábrica de cantería de grandes dimensións, que chega a alcanzar unha altura máxima de oito metros, xunto cunha torre cilíndrica de catro metros de diámetro con saeteiras, ao pé da que foi achado un escudo coas armas dos Parga, dos Bolaño e dos Ribadeneira.
Bibliografía
- DEL CASTILLO LÓPEZ, Ángel; “Fortaleza de Puebla de Parga”, Boletín de la Real Academia Gallega de Bellas Artes, 72. A Coruña 1913.
- DEL CASTILLO LÓPEZ, Ángel; “Puebla de Parga”, Inventario de la riqueza artística y monumental de Galicia. Edición facsímile. Fundación Pedro Barrié de la Maza. A Coruña 2008. Páx.460.
- MOURE, Xabier; “Castelo de Parga”, Castelos e Torres. Requiem polo Patrimonio de Galicia.
- TROIANO, Xosé; “Castelo de Pobra de Parga”, Patrimonio Galego.
